मन तुझं भोळभाबड...

मन तुझं भोळभाबड गावठी तुझा साज
दरवेळी आपली वाटते ' ए आये' ची गाज
बोल तुझे चावट तरी पिक्चर दगाबाज नाही
चड्डीला काज नाही नाडीची ह्या लाज नाही

किती नट आले गेले तुला काय घेणं
गिनीजबुकात नाव तुझ सिल्वर जुबिली लेणं
मान सन्मान दोन्ही काय काल होते आज नाय
चड्डीला काज नाही नाडीची ह्या लाज नाही

मन तुझं साधभोळ...

मन तुझं साधभोळ बेरकी तुझा साज
दरवेळी कशी येते विडंबनाची गाज
टीका तुझी वर्मी तरी गाणे राडेबाज नाही
कवड्यांना लाज नाही केश्याला इलाज नाही

किती कवडे आले गेले तुला काय घेणं
फेसबुकी वावर तुझा गावामधलं बेणं
लाइक कॉमेंट दोन्ही काय काल होते आज नाय
कवड्यांना लाज नाही केश्याला इलाज नाही

माध्यमी खास वेड्यांचा...

माध्यमी खास वेड्यांचा । तमाशा चालला सारा ।
गमे या भ्रान्‍त संसारी । खऱ्याचा एक ना तारा ॥

कुणाला वेड समराचे । कुणाला युद्ध तह जाचे ।
भ्रमाने टिआरपीच्या । तयांचे चित्त ते नाचे ॥

कुणाला दाम बहकावी । कुणाला पक्ष चळ लावी ।
कुणाची नजर धर्माच्या । नशेने धुंदली भारी ॥

अशा या भडक माथ्यांच्या । पिश्यांच्या लहरबहरींनीं ।
पहा या जाल दुनियेची । भिंत ही रंगली सारी ॥

चाळ ही हदरून जाते ...

चाळ ही हदरून जाते चालता तू चंचले
देह हा हलवीत जाशी हालती पाळेमुळे

वाटते पाहून तिजला ही कटी की कंबरा
काल थोडीशी पळाली दार अमुचे मोडिले

वाढविले सर्व हे जीने पहा पायी तुझ्या
जे तुझ्या चालीपरी, घेरापरी रुंदावले

गे विशालांगी कशाने झाकशी काया तुझी ?
लागले तागे किती मग सौंदर्य हे मावले

सारखे शिंकीत जाशी...

सारखे शिंकीत जाशी का असे तू चंचले
वेंधळी पाहून मुर्ती हासती सारी मुले

वाहते नाकात गंगा ना कटी रूमाल ही 
मोकळे नाका करोनी हात पदरा पूसीले

शिंकूनी जीव हा बेजार की पायी हिच्या 
मी अशा शिंकेवरी, सर्दीवरी वैतागले 

घे जरा वाफा घशाला झाक अन काया तुझी
पाहू दे सर्दीविण मज नाक तूझे मोकळे

उघडी पाठ

 स्वाती ताईंची हिरवी जिद्द बघून आमच्या वस्तिगृहातील काही आठवणी हिरव्या झाल्या

रद्दीच्या साठलेल्या थरात....
मासिकाचा बोटभर तुकडा शोधून,
टंच टंच दिसणार्‍या जाहिराती मधल्या
वितभराच्या कपड्यात....
किती ग सुंदर दिसतेस!

तुझ्या एका उघड्या पाठीनं
''जीव शिंपडलाय या देखाव्यात''
शरीराला घट्ट धरून ठेवणारी तुझी वसनं...
आणि पांढर्‍या शुभ्र 'पार्श्व'भूमीवरच..
तो टोकाचा हसरा काळा तीळ,
म्हणजे सौंर्दयाचा कळस!

आहा...!
डोळे अगदी तृप्त झाले तुला पाहून.

बर आहे..., तू चित्रात आहेस!,
अशीच राहशील कायम...
अशीच राहील तुझी कमनीय काया,
तुझ कोवळे पण..
तुझी उघडी पाठ!
न जराठता, कोमेजता!

=====================
केशवसुमार............ १९-०७-२००८

कमळाला जड झाले नाते धनुष्यबाणाचे

 जुन्या विडंबनात काही बदल करून

कमळाला जड झाले नाते धनुष्यबाणाचे

नि वाटप अडले "खात्या"चे

मित्रांनी सहज उचलिले धनू युतीबळाचे

पूर्ण जाहले जनतेच्या ही हेतू अंतरींचे

उभे ठाकले भाग्य बहुमत समोर सगळ्यांचे

धुर्त घड्याळी दुरून न्याहाळी सैन्य धनुर्धारी

सपोर्ट देऊन दुबळी केली शिवशक्‍ति सारी

कळू लागले गुपित हळू हळू दादांना घेण्याचे

उंचावुनिया जरा मागण्या सेना ही पाही

तडिताघातापरी भयंकर नाद 'नाही' होई

कमळाने सांगितले आकडे जाग जिंकल्याचे

मावळल्या सगळ्या आशा , अन रुसले राजे

फक्‍त हसले, आणिक गेले गावी ते जे

सुरु जाहल्या नाराजी चर्चा खलबत सुत्रांचे

हात सोडुनी म्हणे कमळ मग सेनाप्रमुखासी

"आजच करतो संपर्क मी इतरही मित्रांशी"

आनंदाने खुलले डोळे घड्याळ प्रमुखांचे

धमकीने त्या आले भरभर तापातून भेटी

अधिक मागती, अधिकच्या मग वाटाघाटी

गृहखाते ही हवे अम्हाला मंदिर मलिद्याचे

वेशीवरती जसा भरावा ढोरांचा बाजार

तसा चालला 'सागर'तीरी 'खाते' व्यापार

पडद्यामागे मीलन झाले 'माया'-ब्रम्हाचे

झुकले थोडे ते हि, हे हि ठरला व्यवहार

टिव्हीवरती नेते करती युतीचा उच्चार

'जादा खाती' पदरी पडले दान रुसण्याचे

लाज, तत्त्व ही सोड, सर्व तू सत्तेच्या करता

फक्त येव्हढे कळले "केश्या" हे नाटक बघता

कमळाला हे नडले सैनिक धनुष्यबाणाचे

नसतेस घरी तू जेव्हा...

नसतेस घरी तू जेव्हा
जीव हलका हलका होतो
पीण्याला जमती सारे
अन्‌ एकच गलका होतो

नभ फाटून वीज पडावी
जल्लोश तसा मी करतो
ही शुद्ध जरा क्षीण होते
अन्‌ पती बोलका होतो

येताच विड्या ओठांशी
मी दचकून बघतो मागे
खिडकीशी थांबून ओढा
मग गंध तयांचा जातो

तव घरात अवतरण्याच्या
मज स्मरती घातकवेळा
घर भरभर अवरून सगळे
मी पुन्हा सात्त्विक होतो

तू सांग सख्या मज काय
तू केले मी नसताना ?
माझा मग जीव उगाच
भात्यासम धडधड करतो

ना अजून झालो चालू
ना हुशार अजुनी झालो
तुज पाहून मी डगमगतो
अन् चरणा वर तव पडतो !

जेव्हा तिची नि माझी धडकून भेट झाली

जेव्हा तिची नि माझी धडकून भेट झाली
जाडी दहा मणाची माझ्या गळ्यात आली

पायातल्या खुब्याचे ते हाड मोडलेले
तोंडात बत्तिशिने अन स्थान सोडलेले
स्ट्रेचर वरून अमची मग पालखी निघाली

नव्हतीच शुद्ध तेव्हा, नुसतेच हात वारे
अन काळजीत होते, माझ्या घरात सारे
हे लोक कोण माझ्या जमलेत भोवताली

कित्तेक मास नंतर खोलीत बंद होतो
बोलीत मंद होतो चालीत मंद होतो
आजन्म सोबतीला काठी मला मिळाली

डोकं फिरलंया र ह्याचं डोकं फिरलंया

डोकं फिरलंया र ह्याचं डोकं फिरलंया
सपाटून पडलंया म्हणिते अमीच जिंकलंया

ह्याला भरलंया न्यारं पिसं, ह्यो  पाही ना रातंदिस
करमेचे सोडून डोक्या नेसं, हिंडे घेऊन मोकळे केस
वारं भरलंया अंगात वारं भरलंया
सपाटून पडलंया म्हणिते अमीच जिंकलंया

मन नाही ह्याचं स्थिर, ह्याला राहिला ना धीर
अकलेचं  तोडतय तार, ह्याची नजर ती भिरभिर
भुतानं घेरलंया ह्याला भुतानं घेरलंया
सपाटून पडलंया म्हणिते अमीच जिंकलंया

काय सांगावी परवड, झोपेत ही बडबड
झाली घरात ही पडझड, दाढी झालाया वरचढ
कोंबडं आरलंया सत्तेच कोंबडं आरलंया
सपाटून पडलंया म्हणिते अमीच जिंकलंया

नवानवाच नखरा दावी मग बळंच डोस्क लावी
घ्या पेपर मतदान तुम्ही  सांगे संपादक अनुभवी
पाणी मुरलंया कुठंतरी पाणी मुरलंया
सपाटून पडलंया म्हणिते अमीच जिंकलंया

ला.भावा ला.भावा चिडलास का?

ला.भावा ला.भावा चिडलास का? गावाकडे जाऊन लपलास का? कमळाचे फुल गेमाडपंथी, दादांच घड्याळ खिशामंदी ! गृहपदावर अडलास का? उगाच एकटा नडलास का? वेळेत परतुनी येशील का? मिळतंय ते गुपचुप घेशील का? सेना बिचारी रूसत बसेल दादांचा भाव चढत असेल! असाच बसून राहशील का? बहिणींची बोलणी खाशील का? ला.भावा ला.भावा कशाला गेलास? बघता बघता आजारी झालास! शामोंना तरी ओ देशील का? ऐनवेळी मुंबईला येशील का?

मज निकाल उमगत नाही

मज निकाल उमगत नाही बाइट कसा मी द्यावा ! मतपेटीतील धक्याचा मी अर्थ कसा लावावा?

मत जनतेचे आक्रोश

बोटांनी नोंदवलेले

मत अपेक्षांचे रान

महागाईत अवघडलेले

मत धगधगते आवर्त

मत बेकारी, मत चकवा

मत जातीयतेचा गुंता

मत धर्माचे राऊळ

मत बहिणींचा हात

मत पैशाची चाहुल

दुबळ्या गळक्या सबबीत

हा ऱ्हास कसा लपवावा?

चेहरा-मोहरा पक्षाचा

हा भगवा उरला नाही

धनी बहुमताचे तरीही

का आम्ही ठरलो नाही

ह्या कौल न या जनतेचा

कुणी कसा बरे मग घ्यावा ?

मी काय करू माझे चुकले?

आमची प्रेरणा ( https://www.aathavanitli-gani.com/.../Mi_Kaay_Karu_Majhe...)

मी काय करू माझे चुकले?

मुख्यमंत्री पद हवेच म्हंटले !

माझ्यापाठी सैनिक माझे

धावुनी गेले कमळामागे

या संज्याचे ऐकुनी सारे संकट माझे मीच ओढिले !

सत्तेवरती नेत्र लावुनी

उभा एकटा मी गहिवरुनी

दु:ख सारखे डोळ्यांमधुनी क्षणाक्षणाला बोलू लागले !

नसता दिसला काका मज तो

मीही मोहुनी गेलो नसतो

ध्यानीमनी मज ठाऊक नव्हते, इतके अघटीत कधी ना घडले !

पाहिलेली, ऐकलेली, माणसे गेली कुठे?

पाहिलेली, ऐकलेली, माणसे गेली कुठे? एक्झिटपोली बोललेली , माणसे गेली कुठे? रोज अत्याचार होतो मिडियाचा ह्या अता, मिडियाला भावलेली, माणसे गेली कुठे? अंदाज मिडियाचा चुकला जरा असावा सामान्य माणसांचा, होरा खरा असावा जखमा कशा सुगंधी झाल्यात सर्वपक्षी केलेत वार ज्याने, तो सोयरा असावा नाही अखेर कळले, नौका कशी बुडाली नाराज बंडखोरी चा भोवरा असावा का आळ मिडियावर, घेता तुम्ही खर्‍याचा? की वाटले तुम्हाला, 'ए.पो.' खरा असावा! पोलामध्ये उतरली स्वप्‍नें तहानलेली बहुतेक लक्ष्मीचा आटला झरा असावा भेटून एडिटरला, इतुके जरा विचारा शाबूत एवढासा मेंदू जरा असावा दारात ती उभी अन्‌, नयनी अबोल अश्रू लाचार लोकशाही , तो चेहरा असावा माथ्यावरी जनांच्या ओझे सदा निवडणुक हे संविधान 'केश्या' , पण पिंजरा असावा

3

1

Like

Comment

Send

Share

Facebook

झडती माझी घेतली ग जाता प्रचाराला...

झडती माझी घेतली ग जाता प्रचाराला चुगली लगे केली मी सार्‍या मीडियाला

आज अचानक पुढे तो आला
पोलिस फाटा अन जोडीला
फार द्वाड तो मजसी गमला
नाव गाव विचारलं थेट मी , त्याला शिपायाला

माझ्या समोरी उभा राहतो
टकमक टकमक मला तो पाहतो
ब्याग खुणेने उघडा म्हणतो
तरी नाही मी भुलले ग बाई, त्याच्या इशार्‍याला

ब्याग उघडता त्याने बाबा
माझा मजवर कुठला ताबा
त्याची धिटाई तोबा तोबा !
बरळू लागले मी ही बाई, बघता कॅमेर्‍याला

युरीन पॉट ही बघा उघडून
सांगणार मी जनास जाऊ
मग पुसतील हा व्हिडिओ पाहून
किती छळाल सांगू मी ग बाई, ह्या बिचार्‍याला

मिंधे फडणीस शहा मोदी
यांच्या ब्यागा उघडा आधी
त्याची मजला धाडा सीडी
वेड्यावाणी बोलत ग गेले, मग मी प्रचाराला

आता तरी 'देवा' जरा थांबशील का?

आता तरी 'देवा' जरा थांबशील का? कौल हाय दिला त्यो वाचशील का?

युवक तो बेकारीनं करी खळबळ
द्या त्यांच्या हातांना नोकरीचे बळ
महागाईला चाप जरा लावशील का?
कौल हाय दिला त्यो वाचशील का?

चोरी करून नेता कसा वाचतो
पक्ष तुमचा त्याला क्लीनचिट ही देतो
भ्रष्टाचाऱ्यांना ह्या आळा घालशील का?
कौल हाय दिला त्यो वाचशील का?

दिले निवडून जरी आताच्या वेळी
जनता ना राहिली ही इतकी खुळी
घमंड आता थोडीशी तू सोडशील का?
कौल हाय दिला त्यो वाचशील का?

- केशवसुमार

ध्यानाला जातों मी दक्षिणपुरा ...

ध्यानाला जातों मी दक्षिणपुरा ।
देतो निज समय पूर्णं कॅमेरेश्वरा ॥

उत्सव बहु थोर होत ।
मिळतील टीआरपी बहुत।
रुग्ण ,भक्त सर्व येत ।
नट नर्तक सकल जमत ।
न मिळे अशि मौज पुन्हा पाहण्या नरा ॥

-केशवसुमार

साहेबांची जागा

(सदानंद रेगे ह्यांच्यासाठी)
ऑफिसची
        पायपीट केली
तेव्हा कुठं
तुमची ती
खरोखरीच्या साहेबांची जागा 
        अस्फुटशी  दिसली.

तिच्या अलीकडली
तुमची
रंगीबेरंगी धाग्यांची 
साहेबांची सेक्रेटरी
मात्र कालत्रयी
नव्हती अजिबात अस्तित्वांत
(असं शिपाई  शांताराम  म्हणाला).

जाता जातां
कॅन्टिनमध्ये लंचला   
तरी
अशी थाप
        मारायला नको होती तुम्ही.
अहो, आम्ही
शोधायचं काय काय
कसं
        नि किती?

भेसुरगाऊन छळले इतुके...

भेसुरगाऊन छळले इतुके छळण्याच्या पलिकडले
प्रथम तुला ऐकियले आणिक भलेभले ते रडले

अर्थ जुन्या गीतास मिळाला
छंद नवा अन्‌ ताल निराळा
त्या दिवशी अन प्रथमच सारे सूर पहा गडबडले

आठवते फ्युजनच्या रात्री
लक्ष सुर गळपटले गात्री
गितात तुझिया गर्दभांचे रहस्य मज उलगडले

सांग सांग भोलानाथ, पाऊस पडेल काय?

सांग सांग भोलानाथ, पाऊस पडेल काय? पुन्हा एकदा साहेब भिजून सत्ता मिळेल काय?

भोलानाथ तुतारी चिन्ह झेपेल काय? प्रचारात फुंकताना आवाज येईल काय?

भोलानाथ भोलानाथ खरं सांग एकदा बारामतीत खासदार होईन का रे चारदा?

भोलानाथ यंदा आहे भावकीचा पेपर वहिनी हरवून पुन्हा मी वाटेन का रे साखर ?