दादोबा दादोबा चिडलास का?

आमची प्रेरणा दादांची मनधरणी ...

दादोबा दादोबा चिडलास का?
कमळाच्या फुलामागे लपलास का?
कमळाचे फुल संघवादी,
काकांच घड्याळ राष्ट्र्वादी!

ताई-काकांवर रुसलास का?
असाच एकटा गेलास का?
आता तरी परतुनी येशील का?
काय हवं तुला ते सांगशील का?

ताई बिचारी रडत बसेल
काकांचा पारा चढत असेल!
असाच बसून राहशील का?
काकांची बोलणी खाशील का?

दादोबा, दादोबा कुठे रे गेलास?
दिसता दिसता गडप झालास!
काकूला तरी 'हो' म्हणशील का?
ऐनवेळी राजीनामा देशील का?

रात्रीस खेळ चाले...

रात्रीस खेळ चाले सरकार स्थापनेचा
समजेल ना कधीही हा खेळ बेरजांचा ..

'धनुबाण' ना स्वयंभू 'घडी' 'हात' जोडतो हा
सत्तेत हक्क अर्धा 'कमळा'स मागतो हा
ऱ्हासास होय साक्षी सैनिक 'सायबां'चा

आभास बातम्या हा.. नसतो खरा प्रकाश
जे सूत्र सांगती ते असती नितांत भास
फसतात बातम्यांना हा दोष वाचकांचा..

या लाजिर्‍या क्षणाला ना पाहवे दिठीत
धरणात मुतणारे कमळासवे मिठीत
अपमान चालला हा जनते तुझ्या मतांचा..

स्टेटस...

https://www.facebook.com/vijay.tarawade/posts/560183077389399?comment_id=3160763637331317&notif_id=1574130059602289&notif_t=feed_comment_reply

स्टेटस

स्टेटस असतात कधी साधी
रत्यावरच्या शिवीसारखी
स्टेटस असतात कधी बोल्ड
भलतीच, चक्क ओवीसारखी

कधी असतात आरस्पानी
पण बरीशी फसलेली
कधी अर्धपारदर्शक
आतबाहेर असलेली

अमुकवादी तमुकवादी
कोशामध्ये बसलेली
क्लिष्ट होऊन स्वतःवर
यावर त्यावर रुसलेली

काही तरी मागणारी, काहीच न देणारी,
कोड्यात पाडणारी,गरळ ओकणारी,
अर्थांना निरर्थक शब्दांच्या नादी लावणारी
वात्रटिकेसारखी खोचक, शिवीसारखी कडक

साधे स्टेटसच आवडत नसेल तर
आपलं काही चुकत नाही ना?

दिवस आजचा असाच गेला ...

आमची प्रेरणा महाराष्ट्रातील आजच्या राजकीय घडामोडी आणि शांता शेळके यांची लावणी 'दिवस आजचा असाच गेला ...' https://www.aathavanitli-gani.com/…/Divas_Aajacha_Asach_Gela

दिवस आजचा असाच गेला आता तरी द्याल का?
काका अहो, पत्र मला द्याल का?

भगवा फेटा डोक्याला बाधुनी
मी वाट पाहिली 'मातोश्री' बैसुनी
ही घडीमागुनी 'घडी' जातसे सुनी
राजभवनी लागले डोळे; फॅक्स धाडाल का?

कितीकिती योजिले होते बोलायचे
मागचे बोलणे होते विसरायचे
संगतीत तुमच्या होते बहरायचे
'पोळ्या' आजच्या शिळ्या जाहल्या वाटाया न्याल का?

या सरत्या राती तळमळतो मी किती
वाटते पलंगी उगा मोडली युती
मज हसे जमाना, नको नको ती भिती
उद्या तुम्हाला चान्स मिळाला , 'मामु' कराल का?
अघाडीमध्ये, वचन मला द्याल का?

पुन्हा एकदा भोलानाथ...

पुन्हा एकदा भोलानाथ...🐮🐂🐮


सांग सांग भोलानाथ, सरकार बनेल काय?
अघाडीच्या सपोर्टावर सेना तरेल काय?

भोलानाथ ऐनवेळी शहा येतील काय?
मंत्री हळूच फोडताना आवाज होईल काय?

भोलानाथ भोलानाथ खरं सांग एकदा
राष्ट्रपती राजवट लागेल का रे यंदा?

भोलानाथ आज आहे पवारांचा पेपर
'मुख्यमंत्री सेनेचाच' वाटेल का रे साखर?

सांग सांग भोलानाथ, कमळ तरेल काय?

सांग सांग भोलानाथ, कमळ तरेल काय?
सेनेमध्ये फूट पाडून बहुमत मिळेल काय?

भोलानाथ घड्याळाची साथ लाभेल काय?
घोटाळ्यांच्या चौकशीत गजर होईल काय?

भोलानाथ भोलानाथ खरं सांग एकदा
विदर्भाचे वेगळे राज्य जमेल का रे यंदा?

भोलानाथ परवा आहे विश्वासाचा पेपर
विधानसभी पास होऊन वाटेन का मी साखर?

सांग सांग भोलानाथ ....

पाच वर्षांनंतर पुन्हा एकदा ....

सांग सांग भोलानाथ, सेना नमेल काय?
राऊतांना काही दिवस सुट्टी मिळेल काय?

भोलानाथ इडी आता कमी येईल काय?
नोटीस हळूच देताना आवाज होईल काय?

भोलानाथ भोलानाथ खरं सांग एकदा
पाच वर्षात मुख्यमंत्री बदलतात का रे दोनदा?

भोलानाथ आता आहे बहुमताचा पेपर
फिफ्टी फिफ्टी लाईफलाईनचा करवा का वापर?

बजेटातली तरतूद सारी...

बजेटातली तरतूद सारी 'अच्छे दिन'चा वसा
हसा जनांनो हसा

तुम्हा सांगतो शक्कल नामी
'रोजगार' हा देतो हामी
'झीटिव्ही'च्या ऑफिसबाहेर 'भजी' तळाया बसा

मते मिळवण्या धर्म चांगला
'जुमल्या'चा 'आधार' घेतला
भारतभूला महान करण्या जगभर फिरतो असा

सर्व मागची विसरा वचने
चला उद्याची रंगवू स्वप्ने
बघा 'अरुण' हा 'बावीस'चे चित्र खुलवितो कसा

नको मारूस आख...

नको मारूस आख
तुला ‘सुमां’चा धाक
भर संसदी करिशी खुणा
करू नको पुन्हा हा गुन्हा

द्वाड भाजपचा डाव
तुझं जाईल नाव
तू रे ठरशील पप्पू जुना

नको उठण्यास सांग
जरा समजून वाग
तुझ्या डोळ्यांत अवखळपणा

का रे मारली मिठी
पडे कपाळी आठी
गूज कळले न सार्‍या जना

हा एकोणिसचा घाट
नको लावूस वाट
धर आवरून आपल्या मना

सोशल मिडियाच्यावरती , ढोल कवाचा वाजं जी...

सोशल मिडियाच्यावरती , ढोल कवाचा वाजं जी
धुत्लं थोडं पाय जरासं , झिम्मा फुगडी झालं जी

निवडणुकीच भरलं वारं, उधानसारं आलं जी
येड्यापिश्या भक्तांसाठी पुरतं लागीर झालं जी

मोडुन गेला कणाच सारा, हा बोभाटा केला जी
खुर्चीवरती डोळं ठेउनी, सेवक लाचार झालं जी

फेबुकाच्या भींतीवरती , कोयडं बोल बोलं जी
"केशवा"च मन थोडं, लिहून वंगाळं झालं जी

'भूषण' कसा? बघ चोरी ...

'भूषण' कसा? बघ चोरी !
बघ हा चोरी डॉक्युमेंटेशन ||

राफेल हे अडे , राफेल हे नडे
राफेलचिमुळे मम् झोप ही उडे
विफलयुक्तीवादा मार्गे चर्चेत शिरी ||

आता तरी देवा थोड थांबशील का?

आता तरी देवा थोड थांबशील का?
प्रूफ ज्याला म्हनत्यात ते दावशील का?

'पप्पू' तो कवाचान करी खळबळ
देई 'हिंदू' त्याला अन मारुतीचे बळ
न्यायालयी तरी खर बोलशील का?
प्रूफ ज्याला म्हनत्यात ते दावशील का?

चोरी करून चोर कसा पळतो
संशयाला जनतेला वाव मिळतो
मूळ फाईल गेली कुठ सांगशील का?
प्रूफ ज्याला म्हनत्यात ते दावशील का?

दिले निवडून जरी मागच्या वेळी
जनता ना रहिली ही इतकी भोळी
मन त्यांच आता तरी वाचशील का?
प्रूफ ज्याला म्हनत्यात ते दावशील का?

आला निवडीचा महिना...

आला निवडीचा महिना
झटपट खलिता पाठवा
मला लागलाय खोकला
युतीचा 'हात' कुनी भेटवा

साऱ्या देशावर टाकलय
नामोनी जादूच जाळं
काही सुचंना मजला
करतेया भलतंच चाळं
रोज सपनात येते
पीएम पदाची माळ
त्याच्या साठीच मांडलाय
सत्तेचा इथ मी खेळं
झोप लागं ना मजला
झोप लागं ना मजला
काँग्रेसला निरोप पाठवा
मला लागलाय खोकला

खुर्ची साठीचं आलो
मोडून शपथा नि वचनं
द्या सोडून तुम्ही बी
भ्रष्ट मी तुमाला म्हणणं
असं कसं चालायचं
नुस्तच धरून धरणं
युती वाचुन झालाय
मला बी अवघड जिकणं
लै वाढलया दुखणं
लै वाढलया दुखणं
ममताला मध्यस्थ बोलवा
मला लागलाय खोकला

नका झटकू पावणं
किती तुम्हा सांगावं
घ्या युतीत मजला
प्रेमानं कुरवाळा वो
पाया पडतो मी तुमच्या
थोडंसं ऐकाल का वो
ह्या वेळेस लढूया
विसरून भेदभाव
पण दिल्लीच कोकरू
पण दिल्लीच कोकरू
अडलंय कस बी पटवा
मला लागलाय खोकला

झाली गेम आतां मी फिरें माघारीं ...

झाली गेम आतां मी फिरें माघारीं ।
आपली ही बरी राज्यसभा ॥१॥

घररिघी जालें पुतण्याचे बाळ ।
धारिलें सोवळं मोठेपण ॥२॥

भावकीचा अंगसंग झाला आतां ।
हारण्याची चिंता 'केश्या' ह्मणे ॥३॥

'रागा' करुणाकरा...

सध्या काही माध्यमे, अँकर/पत्रकार,नेते,फेबु/ कायप्पा पंडित वगैरे वगैरे पोटतिडकीने/ काकुळतीने विरोधीपक्षांना युती करायचे सल्ले देताना आणि विनवण्या करताना बघून .....

'रागा' करुणाकरा करितसे धावा |
जा युती जुळवा लवकरी ||१||

ऐकोनियां आमुची करुणेची वचने |
व्हावे पक्षश्रेष्ठी उतावीळ ||२||

'शामो' पुढे अवघा दिसे रिता डाव |
घेउनि हाती 'झाडू' वाट पाहे ||३||

उशीर तो आता न पाहिजे केला |
आहो जी 'राहुला' मायबापा ||४||

उरले ते एक हेचि काज आम्हा |
अवघेची पर्याय शून्य जालें || ५||

युपीए हो आता करी कृपा दान |
पुन्हा जुने दिस दावी डोळा ||६||

"केश्या" म्हणे आले कैसें 'बुरे दिन' |
सारे 'चौकीदार' झाले आता ||७||

खेळ मांडीयेला ...

खेळ मांडीयेला निवडणुकिचाही ।
नाचती भक्तगण जाली रे ।
लाज स्वाभिमान गेला पावटणी ।
मतदारा लागतील पायीं रे ॥१॥

टोपीचंदनउटी नेत्यांच्या माळा
जानवं मिरविती गळां ।
ट्रोल सवंग होई पोस्ट वर्षाव ।
तारतम्य हीन सोंहळा रे ॥२॥

वर्णअभिमान आठवती जाती
एकमेकां लाथाळण्या देती ।
अन फेक वृत्तें जाल भरावीती ।
बेकारा रोजगार मिळती रे ॥३॥

होतो जयजयकार गर्जत अंबर
मातले हे भक्तगण दोन्ही रे ।
'केश्या' ह्मणे सोपा करा हा उपाय ।
बंद करा सोशल वावर रे ॥४॥

शूर अम्ही सरदार...

शूर अम्ही सरदार अम्हाला लाज न कसली भीती !
देव, देश अन्‌ जनतेसाठी केली आम्ही युती!

सत्तेच्या गर्भात विसरली झूंजायाची रीत
कमळाशी अन लगिन लावलं चारीमुंड्या चित
खुर्चीसाठी शेपुट घालू अशी आमची ख्याती!

जिंकावे वा लढून मरावं हे न अम्हाला ठावं
मांडवली ही करुन जगावं हेच अम्हाला ठावं
सत्तेपायी इसरू अमुचे सैनिक-जनता-निती!