आमची प्रेरणा प्रदिप कुलकर्णी यांची सुरेख कविता ...हा सुखाचा सोहळा !!
(...हा सुखाचा सोहळा !!)
दार हे उघडेच थोडे ठेउनी मी झोपलो
काल मजला मच्छरांनी त्यामुळे छळले किती...!
भोवती माझ्या कसे बघ गीत गुणगुणतात हे ?
लावले कासव; तरीही डास घुटमळती किती !
सोड माझी पाठही अन् सोड माझी साथही
चार घटका झोप मजला घेउनी देऊ नको...
पाठ ही मी खाजवोनी,रात्र सारी जागतो...
रे मला चाऊ नको तू रे मला चाऊ नको...
आज ओडोमास हे मी जाउनी बघ आणले
अंगभर चोपून माझ्या तू जरा देतेस का ?
आज मी झोपेन म्हणतो पार मुडद्या सारखा...
आज माला झोपण्याला तू मदत करतेस का?
झोप झाली; बोललो...हे सांग आहे का खरे ?
झोपण्याचे स्वप्न माझे जाहले साकार का ?
आपल्या गाद्या जरा डागाळल्या गेल्या तरी...
रोज ओडोमास मजला फासुनी देणार का ?
अजुन हा बघ गंध आहे, ही निशा गेली तरी...
रंग ही गादीस आहे, बघ जरासा सावळा
रात्र ही येते...तशी मज झोपही येते अता
आणि ओडोमासने मज...हा सुखाचा सोहळा !!
(रचनाकाल ः २२ ऑगस्ट २००७ )
- केशवसुमार
कोणत्याही टिप्पण्‍या नाहीत:
टिप्पणी पोस्ट करा